محسن عايض سلام عليكم هلا شنو حالكم يا بـــــاهي ؟؟ - مو تشا .. عاده ما صرفوش المعاش وقدك تشتي الإيجار ..والماء والكهرباء مافيش شهر يا اخي تُسمحنا دعم لمناصرة عيدالاضحي .. قد حالت أمه حاله والله ان فرحته محتلة مثل ما فلسطين والسعودية واليمن والعراق ومصر والسودان والصومال. لك لعينة المعلونة تشلك تجي قبل ما يبدأ الشهر ووسطة وقبل ما ينتهي وبعد ما ينتهي وقبل الاكل وبعده انت صاحب عقار ولا علاج هههههه !! مو معك يا إذوه ...! - انا مناش صاحب البيت انا عمر المختار الى حرر ليبيا الأبية من الطليان ... - انا إفدى قلبك يا عمر المختار .وقلب أمك وقلب ليبيا النابض انا احميس تراب ليبيا . اما تراب اليمن قد لوثوه الطليان حق الجزيرة العربية وعجنو أمه بالالم والفقر والجهل والمرض والخوف والاستسلام والانهزامية والعمالة والارتزاق والخيانة والمشيخة الزائفة والقبيلة المغتصبه والديمقراطية الصورية والوحدة بالانانية المفرطة ... وخليني أرحب بك بالليبي.... واقول لك منور ياسيدي عمر المختار وانت تاج رؤسنا وفخرنا ومعاك وانشاء الله ربي ينصرك وينصرنا وأهلن وسهلا بك في وطني اليمن .وانا اسف جدا كنت احسبك صاحب البيت ههههه . وأجيت بوقتك ياااااااااااااااا عمر المختاااااااااااااااااار حـــــررني من صاحب البيت قدنا أتخايله مثل عزرائيل ..وخلى الطليان سهل انا لهم با أكون (أعرر) لهم وما يفهمونيش .. المشكلة الطليان حقنا ما تقدرش حتى (تعرر) لهم معاهم مترجمين بالرئاسة وبالامن القومي والسياسي للعرعار وبس ما يترجموا لهم اننا محتاجين أبسط مقومات الحياة محتاجين لُــقمة وحظن نحدف أبوووووووه وقت البرد ويحدفنا كما أمرنا الله واذا به مشقر ريحان من حق جبل صبر و رصيف نرقد فوقه مع الكرتون ولا بدون هههههه مثل أصحابنا (الدحابيش) يوم ينزلوا يطلبوا الله بمحافظة عدن عُمال حراج وبساطين وأصحاب بوفيات ومطاعم وعاد أصحاب عدن يقولوا نهبتنونا ، راقدين بغرفة نوم وفي بيوتهم والدحباشي ينزل يطلب الله ويقصده من محافظة الى محافظة ويرقد فوق الرصيف بشوارع المنصورة بالله عليك يا عمر المختار من الناهب ومن هو المنهوب ؟؟!!!!!!!!!! - علاش دير في روحك غبي سطحي (هلبه ) وهلبه " بالليبي يعني كثير ". - ياطاهش الحوبان.. إنهض أنت إبن اليمن بلاد ألجدود وموطن العرب الاول ، علاش تتأثر بهم وتستسلم ..عيش مثل الاباء والاجداد بعزة نفس وكرامة .إبني يا طاهش الحوبان أسمع أسمع مني الاستبداد والعلم ضدان متغالبان والمستبد يسعى إلى إطفاء نور التعليم ونور التثقيف ونور الاعلام الحر المستنير والارشاد الديني .. وبعدين اذا كنت تؤمن بان الاسلام فكر مستنير إرجع الى أول اية قرانية نزلة قال إقراء وأول مِنَّة أمتن بها الله على الإنسان هي أنه علمة بالقلم مش علمه العسكرة ههههههههه . - اقول لك مو أنهض معابوش رووح خليني أرقد لوما يطلعين الــــذَر بلقفي ويأكلوني الكلاب، حتى الموت ميتنا وأحنا أحياء ميت العقول والتفكير ، ميت الروح وخلي الجسد عَكس الآية المفروض يميت الجسد ويخلي الروح .. أقول لك يا عم عمر المختار قَا هي عوجاء من سفال النقيل .. حول لي لو سمحت مع (ويستر نيون بيقمة )كبش ونــــَــكس وجرم داخلي ولا قيمة حبه دجاج للعيد إذا أستلمت المعاش.. ولو سمحت لا تحقدنيش بالكرامة لانها أصبحبت أسم فقط وخالتي بالقرية أسمها كرامة ما أشتيش أذكرها شتقول أيش عملت لإبنها وهو معتقل بالامن السياسي لانه جزع وأتفرج لبيت غالب مطهر القمش الله يــــِــقمشه من عنده .وكإننا بعصر الامام الله يرحمه يرحمة الأبرار قالوا أن أللي كان يتفرج للقصر حقه بصالة يحبسوه وانا ما صدقتش هذا الكلام ولا دخل عقلي لكن مصدق على القمش ههههه ..أقول لك يا عم عمر المختار تقدر لو سمحت تسأل رئيس جهاز مخابرات أمن الدولة لموا ما يزقرش اللصوص والنهابين والمهربين والى يعملوا خيم في وسط الشارع للاعراس هههههه بس يزقر الى يتفرجوا لبيته ويحانبوا عياله وبس .. ولا أنتَ مثلي خائف لا يـــــــِــقمشك . أنا أعرفك بطل بس أمزح معك يا سيدي الكبير .... إسمع إسمع أنا أفدي قلبك إذا تقدر تهدر مع القمش قول له لموا ما خرجتوش الناس المحابيس على ذمة قضايا سياسية بطلوا لكم محانبه ظروف البلاد معاد تسمحش للهدره الفاضي حقكم ، الرئيس قال بعيد 22 مايو الماضي مفآجاءة وقال شِخرج كل المعتقلين تقول لموا غير رأيه ؟؟!!!!!! .. كيف أقدر أعيـــــد وأطعم لحمه للعيد والبس نكس وجرم ومعي عار وحريم عيالهن وأزواجهن وأخوتهن بالمعتقل من الشمال والجنوب مُـو من عيد هذه أنا أفدي قلبك .. دموعي يتناطفين على المعتقلين يا عم عمر المختار تقدر تتصور أن واحد من عيالك معتقل بهذا العيد وأحفادك يقولوا أين بابا ؟؟؟ يا جدوا عمر المختار ؟؟!!! مو شتقول لهم زقروهم الطليان حق الجزيرة العربية ... بعد ما قضيت على الطليان زمان .!!!!!!!! واديت روحك انا افدى رووحك الى ما ماتت وعادها تجزع تتفقد العرب ..
طاهش الحوبان
الى كل انسان يحاولة معرفة الحيااااااااااااااة بدون الانقياد الاعمي للغير ... الى كل من يستخدم نعمة البحث ونعمة التصديق ... ما اجمل الحياة عندما نفكر بطريقة سليمة لا بطريقة الانظمة المستبدة .
الخميس، 2 ديسمبر 2010
الأحد، 28 نوفمبر 2010
كوابيس طاهش الحوبان (1)
02/11/2010
محسن عائض>
نائم و تلفوني صامت وهو يرن أستغربت! قلت للتلفون كيف صامت وانت ترن.. منه صنعك يا با نيري؟ قال التلفون انا صيني ههههههه المهم رديت على التلفون وواحد يتكلم من (نخره ) تقول الا التحويلة حق أرحم الرحمين!!: كلم الفندم يا طاهش.. - وانا مليان نووم: منه الفندم؟ له جني يفدمه.. خليني ارقد خليت التلفون يرن وهو صامت.. جني!! - مش وقت المجبر هذا عاد اجي اسحبك من نخرك؟ تكلم باحترام .. معك تحويلة رئاسة الجمهورية. - على طول يا اخي انا كنت اكلمك وانا راقد انا اسف يا فندم.. - صحصح وكلم الفندم فخامة الرئيس.. - على طول يا سيدي. - فخامة الرئيس علي عبدالله صالح: مساء الخير.. كيف انت يا طاهش.. ما فعلت مع المفسبكين؟ - يا فندم مو شا اعمل لهم (البيس ) مع حسن اللوزي وزير الاعلام والفضائية اليمنية يطحنوا ستة مليار!!! ويهربوا لك المشاهدين ويخلوهم يسخطوا ويلعنوا لك ولليمن 24 ساعه. نص الشعب قد تعلم العرعره. وتشتي مني عمل؟ والله لو معي هذه الموازنه لا اخلي الشعب اليمني بدل ما يبكروا يقولوا يالله أرضي علينا وعلى والدينا با اخليهم يقولوا يا اليمن السعيدة أرضي علينا وعلى والدينا... وبا اخليهم بدل ما يعبدوا الله يعبدوا اليمن لان خلاص حب الله هي عبادة الاوطان وتقديس المواطنين.. بدل ما يحجوا للخارج يحجوا في كل ركن من اركان اليمن.. وبدل ما يصوموا لله يصوموا من اجل اليمن السعيدة. - الرئيس انت مواطن يمني وهذه بلدك ويجب ان نعمل (كُلتنا ) .. وانت اتحمل المسئولية من اجل اليمن من اجل الديمقراطية والتنمية... كُلكم أمراض ما تشتوا تشغلوا الا بزلط.. - يا فندم تدي لواحد مليارات وما تقول له حتى انت مريض ومعتوه وتشغل بنظام ديزل وسكان يمين وطيرت لنا بالزبائن حق الفضائيات اليمنية وحق العقيق وحق الايمان وحق يمانية.. وانا ادي اجهدي بس انت اسمع مني حكاية انا احميسك؟ مالك ومال وزير الاعلام!!! - الرئيس ما تشتي (تجول )؟ - يا فندم انا افدي قلبك كن اسمع لكل الناس وخذ من كل الناس كم جهدك انت تفكر لوحدك؟ يا رجال لو انت تلفزيون ولا راديوا قدك معطل 33 سنة تفكير 24 ساعه، تفكر بدل شعب مدووخ راكن عليك وبس؟ المهم يا فندم افتحوا الاستيراد لكل شيء الا الدين لا تستوردوش.. يا فندم خلونا نستورد مخدرات وهروين ولا نستورد دين.. خلونا على حقنا الدين بلدي وطعيم وما يخرجش الدم: شافعي وزيدي وقليل يهود وقليل بهرة وبس وبس انا افدي قلبك.. - الفندم: من يستورد دين؟ من وين بتدي هذا الكلام؟ ما بش عندنا هذه الكلام بطلوا لكم مزايدة هذا يمكن واحد اثنين معتوهين أمراض؟ - يا فندم الله يرحم والديك اقول لك افتح صفحة جديدة ولا تعتبر كلامي رسمي معك عفى الله عن كل المستورد من سابق حتى لو كان علي محسن الاحمر.. صفحة جديدة وبس واي دين مستورد نحرق ابوووه في حرض او في اي منفذ حدودي يدخل منه واي مبلغ مالي من السفارة الاندونسية المصرية السعودية السودانية الى اي مواطن يمني ممنوووووع بحسب (التستور والقانون ) ولا يقدم كشف حساب اذا كان معه منظمة ويعمم باسمائهم بكشف طويل عريض للشعب يعرفهم على واحد واحد.. يا فندم خلينا على خبرتنا الاشتراكيين (الشوعيين ) الشِوع .. وخبرتنا في صعدة (الشيعة ) وبس واعرف جمهورية بشرط ما حد يقول للثاني صلى ولا ما تصلي.. يكون يسكر الشوعي امام الشيعي ويصلى الشيعي امام الشوعي يعني بالمختصر مثل إيران.. يافندم عبدالله بن حسين الاحمر قد رح له.. والان الامور مع حميد الاحمر وخبرتهم قد ظهرهم مكشوووف من الخلف بعد قضية حوث يعني لا تخاف من القلبية الى قرحت رأس الحمدي اليوم بطقم عسكر با تدخل تسحبهم من نخرهم من وسط حاشد.. انا افدي قلبك يا فندم سدقني.. يا فندم اليمن موقعها الاستراتيجي يجعل الصين تدعمها قبل الشقيقة تفكر تخربها وقبل اوباما ان يقول ان اليمن مش مليح ولا مليح.. اذا حاصت عليك الامور اعتمد على الخبرة في صعده يا فندم وعين واحد منهم وزير خارجية، والخبرة في صعده عقولهم نظيفه جدا يخلوا المواطن يزيد يدفع زلط عكس الدين الجديد الى يقول لك صلى وانا با ادي زلط.. واجعل مساجد الدين المستور كلها مراكز ثقافة ومسارح واعتمد على المساجد التى كانت قبل الدين الجديد. وافتح للناس يسكروا ورجع مصنع الخمر بعدن وباينتهي موضوع الحراك كله والسخط على الوحدة الجماعه كانوا الفين على الفهنه وراحة البال مثل لو فكرت با تقطع على الخبرة في الشمال القات يمين لا يخرجوا لك بصميل أخضر.. هذه اسمها ولعه يا فندم ولعه خلوا الناس يفتهنوا الناس ما يقدروش يصبروا الى يوم القيامه يشتوا حقهم من الان السكار.. انا احميسك. يا فندم عمري 34 سنة وانا خاور ارقص في مرقص بدون ما اكون مستحي وكاني عامل فضيحة كله عندنا الا رقصة الحرب قال رقصه البرع.. يشتى الواحد يزقر حتى (مكلفه) ويقوم يرقصه هو وهي بالبيت لكن تقول له عيب وحرام؟ وكيف تشتي نعيش بسلام وبمحبه!! يا فندم تطلع فوق التكسي تشوف صاحب التكس مطرف لك صميل تحت الكرسي!!! تدخل بوابه الجامعه تشوف العسكري مطرف لك صميل..!!! تروح البيت المرة تقول لك (جزعت )عصا للعيال !!! الشعب كله في راسي مرسووم صميل ومنه اخضر ومنه يابس هههه.. نشتي يا فندم نبدل موضوع الصميل بمشاقر بورد اي شيء من هنا يبدأ السلام الحقيقي انا افدى قلبك.. انت تخطب بالناس وقدامك ورد ولكن من حولك كلهم مسلحين بصمول وبسلاح!! ما يصلحش على الاقل يكونوا يهربوا من قدام الكامرا.. والجهال يقولوا قدام الرئيس ورد ومشاقر هو الوحيد بالجمهورية رمز للسلام وللحب. وبعدين يا فندم اي واحد يشتي يكون وهابي مرحبا به مرتين لكن بدون زلط وبدون ما يدخل ولا ريال واحد من الشقيقة. وهابي يهب نفسه لله او للشقيقة او للجني الازرق لكن بدون ما يستلم زلط يكون وهابي من اجل الله يهب له الجنة مش من اجل يقول له عمه خرب اليمن هههه يا فندم .. الاعلام عندنا مضروووب .. التربية والتعليم مضرووووب .. الاوقاف مضروووب .. الثقافة مضروووب .. السياحة مضرووووب .. كلها هذه ما تحتاج الى مشاريع خرافية تحتاج الى نية صافية من المسئولين عليها فقط... يا فندم الدين الجديد قيد كل شيء.. امي زارتني بصنعاء وقالت يالله بالستر كانين النسوان بصنعاء كلهن بستاره ملونه والان كلهن سود ومبرقعات.. مو جري بهن يا ابني؟ قلت لها يا امي هذه وزارة الثقافة غائبة تطلع النسوان بالندوات وبالتلفزيون مبرقعات وهن يتاثرين بسرعه.. احمدي الله ان وزارة الثقافة ما قدرت تاثر بك لانك يمنية اصيلة برغم انك ما عرفتي مدرسة ولا حضرتي ندوة ومكانك تلبسي ملابس يمنية اصيلة بدون لون اسود.. يا فخامة الرئيس كما التلفون شطفى.. البطارية ضعيف والكهرباء طافي. التلفون يعمل زيط .. زيط .. وطفى..يا فندم والله ان التلفون طفي.. سمعت دقدقة بالباب وقوات مكافحة الارهاب تداهم العزبة يقولوا سلم نفسك سلم نفسك انت غلقت التلفون بوجه فخامة الرئيس يا زنديق.. مع كثر الخوف قمت من النوووم.. والحمد لله لا قوات مكافحة الارهاب ولا اسمى طلع بقناة الجزيرة خبر عاجل قوات خاصة من مكافحة الارهاب تداهم منزل طاهش الحوبان بسبب إغلاقة التلفون بوجه فخامة الرئيس.