الأحد، 28 نوفمبر 2010

كوابيس طاهش الحوبان (2)
08/11/2010 محسن عائض
راقد بسابع نووم ... سمعت هاتف، .بالدلع هاتف وبالبلدي صوت يجاوي يقول يا طاهش الحوبان ..يا طاهش الحوبان. الا كسبه واب سنحان ماهوش طاهش الحوبان. كان الصوت رزين صوت أنثى عاقلة واثقة من نفسها معها بيس. قلت لها اعقلي لا تذكري سنحان الا وقولي سنحان الله العظيم كما قال الكاتب فكري قاسم .. يا ابني انا ام سنحان وام طاهش الحوبان وام الجزيرة العربية كلها .. يا حجه الله يرحم والديك لا تحلبطي نفسك قد كان صدام حسين يقول على نفسه درع الجزيرة وبعدها طحس .. اهربي لك من الجزيرة العربية بكله .. سدقيني .. - يا طاهش الحوبان: اني بلقيس اليمن التى بنت حضارة اليمن والجزيرة العربية كلها وتكلم عن حضارتي الدين الاسلامي في سورة سبأ اني من جعلت اليمن سعيده وشرعت مبدأ الديمقراطية للعالم واستشرت كل من حولي ولم انفرد بالقرار ولم اكون ارتجاليه لهذا بنيت لكم سمعة طيبة بالحوار وبالمشوره .. - انا افدى قلبك يا بلقيس اليمن قد الدين ضاع بكله مع حضارة سبأ ..وقد عيالك بمارب يخربوا حقك الاثار بالشيولات ويبيعوا حقك السامن للخارج ويرجعوا يخزنوا بالبيس !!! قد عيالك في مارب يا امه يتاجروا بالمخدرات والحشيش ،، قد عيالك يا امه يفجعوا الناس بالارهاب نصهم تنظيم القاعده ونصهم مخدرات وتهريب آثار .. - اعتني بهم يا ولدي هم اخوتك اغبياء يخربوا هويتهم .. -ما همش اخوتي انا اخوتي من الصومال ومن جنوب افريقا من ريمة من صعده من عدن من حضرموت .. حيش لله ان تربطني صله بهم من قريب او من بعيد ..أقول لك مره قتل واحد من مارب وقطعوا الكهرباء على اليمن شهر وفجروا انبوب نفط مو من اخوتي لهم خواء ببطونهم سبع سنين ..
 يا بلقيس اليمن اخوتي الى من صدق في صعده جلسوا يضربوهم بالطائرات والمدافع والدبابات عيب انهم طفوا حتى شمعه على اليمن لانهم يعرفوا انها بلادهم يا بلقيس مو تقولي انتي .. - طاهش يا ابني كل شيء تغير اليوم معكم فيس بوك وتلفونات واجهزة ومعدات تقدروا تعتمدوا على التوعيه بسهولة كان ايامي يا ابني ما فيش الا هدهد سليمان هو الى يقدر ينقل لنا الاخبار .. - ايووووووووه هو هذا (بانيري) الهدهد الى ضيعك وضيعنا يا امه وخليك (تجزعي ) بعد سليمان الى بلاده تدوري زواجه وجنان قُبي ..الله يسامحك .. بس . لو لي قدره اعدم كل فصيلة الهدهد عن بكرة ابيهم هههه . انتي السبب يا امه انتي والهدهد لو كنتي جلستي بمكانك كانت اليمن بخير ..كنتي تعبدي لك الشمس قلتي لا شتدوري سليمان وقرحتي الضمار على اليمن بكلها من ناحية اقتصادية وسياسية وشوفي عيالك بسبب غيابك .. ومن ايامك راحت السعادة بخروجك من اليمن السعيد. -يا بلقيس البنوت حقنا صابرات كلهن من غير زواجه ولا عِملين مثلك .. والزواجه قد هي بيع وشراء قد الانثى تبتاع بيع يا بلقيس اليمن احمدي ربك كان معك حريه جزعتي بعد سليمان وعادك وفيته من فلوسنا هدايا وسامن .. اليوم الرجال يجلسوا نصف عمرهم يشقوا بقيمه الزواجه والنصف الثاني يشقوا عليها ..ما فيش تكافل زي ايامك ومناصفه وكل واحد يدي جهده في بناء الاسرة .. - يا ابنى خلى موضوع الزواجه لوحده اشتيكم تعملوا حمله تعلموا الاطفال والكبار والقاده السياسين الرحمة والعدالة والنعمة يا ابني وهن الثلاث موجودات في اليمن من قبل ملايين السنين ..لكن الان غابين وهذا سبب تعاستكم ! - العادلة أصبحت إنتقام عندنا ... والرحمة عندنا أصبحت ضعف وإذا رحمتي حد يقولوا عليك ضعيف بسبب ثقافة الجهل والتساامح معدوووم معدوم معدوم انتي معاد تبعتي عبدالحليم حافظ ولا يمين بالله لا كنتي تسافري له قد سافرتي لسليمان وهو مش فنان كيف ما عبدالحليم حافظ هههه والنعمة يا امنا بلقيس عندنا في اليمن متوفرة لكن ما نعرف نديرها ونستغلها ..عندنا نعمة السهول الزراعية ونعمه السواحل ونعمه المدرجات الزراعية ونعمه الاثار ونعمه السياحة ونعمه الكوادر البشرية ونعمة الموقع الجغرافي المتميز .. - :طيب يا ابني من هو وزير السياحة يا ولدي؟ وليش ما يعمل حمله على المحافظة على الاثار السياحية ..؟؟!!! - آآآآآآآآح يا امه، اسمه نبيل الفقيه بخورتي انه يخرج يتصور فوق اي منظر سياحي وبس وبس وبس وعفى الله عنه بالموازنه حق السياحة كلها .. - يا طاهش الحوبان .. اريدك توصل رسالة الى كل يمني أن يفكر بطريقة بعيده لا يكون يومه عيده وكل مواطن لازم يعمل له خطة استراتيجية تبدأ انه يمتهن اي مهنه او يتعلم اي علم حتى يستطيع ان يقف على أرجلة ويُكون أسرة منتجة .. - يا بلقيس لا تقلقيش من هذه الناحية .. عيالك كلهم معاهم خطط لكن وقت القات ووقت الساعه السليمانيه فقط وبعدها تنتهى مشاريعهم كما انتهت مملكتك بالساعه السيمانه مع سليمان .. وهم يمكن تاثروا بامهم بلقيس بالساعه السليمانيه ههههه ..اما بالنسبه للمهن يا بلقيس اليمن فالمهن عندنا عيب كلهم يشتوا حاجه واحده فيزة للسعودية او عسكرة فقط .. عندهم الحدادة عيب ووالزراعة عيب والصناعه عيب ووالبناء تعب و السمكرة عيب والعمل في البوفية عيب الناس يا بلقيس اليمن مقسمين بحسب المهن جزار حلاق (منجل ) جشام خضري .. قروي ،دوشان .. برغم ان اقرب وصف للاعلام الرسمي هو الدوشان ههههه ، مقسمين الى طبقات وهذا هو العار والقبح والغباء بعينه يدفعون بالناس الى إهدار طاقتهم وابداعاتهم لانهم يقولوا الاعمال في بعض المهن منافية لعادات القبيلة القبيحه والبعض يفضل ان يكون ارهابي او يتاجر بالحشيش او بالمخدرات او ينهب ولا يمتهن مهنه شريفة .. - اخبرني يا بني عن خليجي عشرين ... - خليجي عشرين مو اقول لك مو إشكي لك فرحنا بالخيبه والخيبه مش راضي بنا .. فرحنا بالتظاهرة الرياضية او اي تظاهرة اجتماعيه سياسية في بلدنا واحفادك في الخليج الى هربوا بعد ما جزعتي انتي بعد سليمان اقتلبوا لنا حاجه غريبه جداً بسبب الى يطلع من الارض (البترول ) اذا انتي تعرفيه ؟؟!! وكاننا ما نحناش اخوة ولا بني عم ولا تربطنا بلقيس في النهاية ولا تربطنا اي علاقة انسانية ، بسيط الجغرافيا والتاريخ والديانة .. ما يعترفوش بك ولا بحضارة سباء ولا بالقران ولا باي شيء .. المهم انتي من باتشجعي في خليجي عشرين .. - يوما ما سوف يعرفون قيمة اليمن اذا ضاقت بهم الظروف يا ولدي ، المهم إنتبة الى أخوتك في الجنووب .. في كل الاوقات لا تكنش تقسي عليهم وكن قريب منهم بدون وسيط لامس همومهم، بلقيس بطنها طاهرة ما تنجب الا يمنين طيبين جداً ..وبا اشجع اذا ريت اولادي جميعهم بخير لن اشجع فريق ضد الاخر ..وكنت احلم ان يكون اسم خليجي 20 في اليمن ( احفاد بلقيس اليمن في الملعب) لكن تاتي الرياح لصالح من معه فلوس لا سامح الله وزير الشباب والرياضه الى سماه باسم واحد من احفادي ونسي الام ...!!! - أبناء الجنوب هم طيبين ومتعلمين ومثقفين ما اختلفناش عليها لكن بعضهم يروج بمكر وخداع ويقول ما همش عيالك يا بلقيس اليمن هم يقولوا انهم صومال ومن جنوب إفريقا ومن الهند معاد يشتوا اليمن ولا يشتوا نسبك ولا كنت با ازبط معاهم قدر استطاعتي .. بلقيس اليمن : لا لا لا يا ابني هم انظف قلوب في هذه المعمورة ولكن من يقول هذا الكلام مدسوس مدسوس مدسوس يخدموا ناس لم يخرجوا من رحم بلقيس اليمن .. يا ابني أوصيك ان لا تعترف لا بالحدود ولا بالجنسيات لانها كلها من صنع التعساء المشوهين (الحكام ) خلال قرون من الزمن قبلي وما زالت حتى وقتكم ... كن انسان بلا حدود بلا جنسيات احترم كل انسان بغض النظر عن حدودة او جنسيته او ديانتة او لونه كي تعيش بسلام مع النفس اولاً .ومع الاخرين ثانياً .. واذا شعرت بشيء اوصله الى ابنائي سوف اتردد عليك .(كما شترقد ) قالتها بلكنة تعز كنوع من المداعبه ههههه . كن بخير انت وجميع اخوانك من الانسانية ..باقة ورد لكل انسااان يعرف معني الانسانية .. ويمارسها .. وخاطركم يا طاهش (بالصنعاني ) قالتها وغائب الصوت وما زلت اتخيل كلامها بكلنه صنعاء لانه المفضل الى قلبي من النساء وربما كانت لكنتها كانها من حضرموت او من تعز او من تهامه او من صنعاء لم اميز كانت كل عبارة اتخيلها من منطقة .. ..
كوابيس طاهش الحوبان (1)

02/11/2010

محسن عائض>

نائم و تلفوني صامت وهو يرن أستغربت! قلت للتلفون كيف صامت وانت ترن.. منه صنعك يا با نيري؟ قال التلفون انا صيني ههههههه المهم رديت على التلفون وواحد يتكلم من (نخره ) تقول الا التحويلة حق أرحم الرحمين!!: كلم الفندم يا طاهش.. - وانا مليان نووم: منه الفندم؟ له جني يفدمه.. خليني ارقد خليت التلفون يرن وهو صامت.. جني!! - مش وقت المجبر هذا عاد اجي اسحبك من نخرك؟ تكلم باحترام .. معك تحويلة رئاسة الجمهورية. - على طول يا اخي انا كنت اكلمك وانا راقد انا اسف يا فندم.. - صحصح وكلم الفندم فخامة الرئيس.. - على طول يا سيدي. - فخامة الرئيس علي عبدالله صالح: مساء الخير.. كيف انت يا طاهش.. ما فعلت مع المفسبكين؟ - يا فندم مو شا اعمل لهم (البيس ) مع حسن اللوزي وزير الاعلام والفضائية اليمنية يطحنوا ستة مليار!!! ويهربوا لك المشاهدين ويخلوهم يسخطوا ويلعنوا لك ولليمن 24 ساعه. نص الشعب قد تعلم العرعره. وتشتي مني عمل؟ والله لو معي هذه الموازنه لا اخلي الشعب اليمني بدل ما يبكروا يقولوا يالله أرضي علينا وعلى والدينا با اخليهم يقولوا يا اليمن السعيدة أرضي علينا وعلى والدينا... وبا اخليهم بدل ما يعبدوا الله يعبدوا اليمن لان خلاص حب الله هي عبادة الاوطان وتقديس المواطنين.. بدل ما يحجوا للخارج يحجوا في كل ركن من اركان اليمن.. وبدل ما يصوموا لله يصوموا من اجل اليمن السعيدة. - الرئيس انت مواطن يمني وهذه بلدك ويجب ان نعمل (كُلتنا ) .. وانت اتحمل المسئولية من اجل اليمن من اجل الديمقراطية والتنمية... كُلكم أمراض ما تشتوا تشغلوا الا بزلط.. - يا فندم تدي لواحد مليارات وما تقول له حتى انت مريض ومعتوه وتشغل بنظام ديزل وسكان يمين وطيرت لنا بالزبائن حق الفضائيات اليمنية وحق العقيق وحق الايمان وحق يمانية.. وانا ادي اجهدي بس انت اسمع مني حكاية انا احميسك؟ مالك ومال وزير الاعلام!!! - الرئيس ما تشتي (تجول )؟ - يا فندم انا افدي قلبك كن اسمع لكل الناس وخذ من كل الناس كم جهدك انت تفكر لوحدك؟ يا رجال لو انت تلفزيون ولا راديوا قدك معطل 33 سنة تفكير 24 ساعه، تفكر بدل شعب مدووخ راكن عليك وبس؟ المهم يا فندم افتحوا الاستيراد لكل شيء الا الدين لا تستوردوش.. يا فندم خلونا نستورد مخدرات وهروين ولا نستورد دين.. خلونا على حقنا الدين بلدي وطعيم وما يخرجش الدم: شافعي وزيدي وقليل يهود وقليل بهرة وبس وبس انا افدي قلبك.. - الفندم: من يستورد دين؟ من وين بتدي هذا الكلام؟ ما بش عندنا هذه الكلام بطلوا لكم مزايدة هذا يمكن واحد اثنين معتوهين أمراض؟ - يا فندم الله يرحم والديك اقول لك افتح صفحة جديدة ولا تعتبر كلامي رسمي معك عفى الله عن كل المستورد من سابق حتى لو كان علي محسن الاحمر.. صفحة جديدة وبس واي دين مستورد نحرق ابوووه في حرض او في اي منفذ حدودي يدخل منه واي مبلغ مالي من السفارة الاندونسية المصرية السعودية السودانية الى اي مواطن يمني ممنوووووع بحسب (التستور والقانون ) ولا يقدم كشف حساب اذا كان معه منظمة ويعمم باسمائهم بكشف طويل عريض للشعب يعرفهم على واحد واحد.. يا فندم خلينا على خبرتنا الاشتراكيين (الشوعيين ) الشِوع .. وخبرتنا في صعدة (الشيعة ) وبس واعرف جمهورية بشرط ما حد يقول للثاني صلى ولا ما تصلي.. يكون يسكر الشوعي امام الشيعي ويصلى الشيعي امام الشوعي يعني بالمختصر مثل إيران.. يافندم عبدالله بن حسين الاحمر قد رح له.. والان الامور مع حميد الاحمر وخبرتهم قد ظهرهم مكشوووف من الخلف بعد قضية حوث يعني لا تخاف من القلبية الى قرحت رأس الحمدي اليوم بطقم عسكر با تدخل تسحبهم من نخرهم من وسط حاشد.. انا افدي قلبك يا فندم سدقني.. يا فندم اليمن موقعها الاستراتيجي يجعل الصين تدعمها قبل الشقيقة تفكر تخربها وقبل اوباما ان يقول ان اليمن مش مليح ولا مليح.. اذا حاصت عليك الامور اعتمد على الخبرة في صعده يا فندم وعين واحد منهم وزير خارجية، والخبرة في صعده عقولهم نظيفه جدا يخلوا المواطن يزيد يدفع زلط عكس الدين الجديد الى يقول لك صلى وانا با ادي زلط.. واجعل مساجد الدين المستور كلها مراكز ثقافة ومسارح واعتمد على المساجد التى كانت قبل الدين الجديد. وافتح للناس يسكروا ورجع مصنع الخمر بعدن وباينتهي موضوع الحراك كله والسخط على الوحدة الجماعه كانوا الفين على الفهنه وراحة البال مثل لو فكرت با تقطع على الخبرة في الشمال القات يمين لا يخرجوا لك بصميل أخضر.. هذه اسمها ولعه يا فندم ولعه خلوا الناس يفتهنوا الناس ما يقدروش يصبروا الى يوم القيامه يشتوا حقهم من الان السكار.. انا احميسك. يا فندم عمري 34 سنة وانا خاور ارقص في مرقص بدون ما اكون مستحي وكاني عامل فضيحة كله عندنا الا رقصة الحرب قال رقصه البرع.. يشتى الواحد يزقر حتى (مكلفه) ويقوم يرقصه هو وهي بالبيت لكن تقول له عيب وحرام؟ وكيف تشتي نعيش بسلام وبمحبه!! يا فندم تطلع فوق التكسي تشوف صاحب التكس مطرف لك صميل تحت الكرسي!!! تدخل بوابه الجامعه تشوف العسكري مطرف لك صميل..!!! تروح البيت المرة تقول لك (جزعت )عصا للعيال !!! الشعب كله في راسي مرسووم صميل ومنه اخضر ومنه يابس هههه.. نشتي يا فندم نبدل موضوع الصميل بمشاقر بورد اي شيء من هنا يبدأ السلام الحقيقي انا افدى قلبك.. انت تخطب بالناس وقدامك ورد ولكن من حولك كلهم مسلحين بصمول وبسلاح!! ما يصلحش على الاقل يكونوا يهربوا من قدام الكامرا.. والجهال يقولوا قدام الرئيس ورد ومشاقر هو الوحيد بالجمهورية رمز للسلام وللحب. وبعدين يا فندم اي واحد يشتي يكون وهابي مرحبا به مرتين لكن بدون زلط وبدون ما يدخل ولا ريال واحد من الشقيقة. وهابي يهب نفسه لله او للشقيقة او للجني الازرق لكن بدون ما يستلم زلط يكون وهابي من اجل الله يهب له الجنة مش من اجل يقول له عمه خرب اليمن هههه يا فندم .. الاعلام عندنا مضروووب .. التربية والتعليم مضرووووب .. الاوقاف مضروووب .. الثقافة مضروووب .. السياحة مضرووووب .. كلها هذه ما تحتاج الى مشاريع خرافية تحتاج الى نية صافية من المسئولين عليها فقط... يا فندم الدين الجديد قيد كل شيء.. امي زارتني بصنعاء وقالت يالله بالستر كانين النسوان بصنعاء كلهن بستاره ملونه والان كلهن سود ومبرقعات.. مو جري بهن يا ابني؟ قلت لها يا امي هذه وزارة الثقافة غائبة تطلع النسوان بالندوات وبالتلفزيون مبرقعات وهن يتاثرين بسرعه.. احمدي الله ان وزارة الثقافة ما قدرت تاثر بك لانك يمنية اصيلة برغم انك ما عرفتي مدرسة ولا حضرتي ندوة ومكانك تلبسي ملابس يمنية اصيلة بدون لون اسود.. يا فخامة الرئيس كما التلفون شطفى.. البطارية ضعيف والكهرباء طافي. التلفون يعمل زيط .. زيط .. وطفى..يا فندم والله ان التلفون طفي.. سمعت دقدقة بالباب وقوات مكافحة الارهاب تداهم العزبة يقولوا سلم نفسك سلم نفسك انت غلقت التلفون بوجه فخامة الرئيس يا زنديق.. مع كثر الخوف قمت من النوووم.. والحمد لله لا قوات مكافحة الارهاب ولا اسمى طلع بقناة الجزيرة خبر عاجل قوات خاصة من مكافحة الارهاب تداهم منزل طاهش الحوبان بسبب إغلاقة التلفون بوجه فخامة الرئيس.