كوابيس طاهش الحوبان (1)

02/11/2010

محسن عائض>

نائم و تلفوني صامت وهو يرن أستغربت! قلت للتلفون كيف صامت وانت ترن.. منه صنعك يا با نيري؟ قال التلفون انا صيني ههههههه المهم رديت على التلفون وواحد يتكلم من (نخره ) تقول الا التحويلة حق أرحم الرحمين!!: كلم الفندم يا طاهش.. - وانا مليان نووم: منه الفندم؟ له جني يفدمه.. خليني ارقد خليت التلفون يرن وهو صامت.. جني!! - مش وقت المجبر هذا عاد اجي اسحبك من نخرك؟ تكلم باحترام .. معك تحويلة رئاسة الجمهورية. - على طول يا اخي انا كنت اكلمك وانا راقد انا اسف يا فندم.. - صحصح وكلم الفندم فخامة الرئيس.. - على طول يا سيدي. - فخامة الرئيس علي عبدالله صالح: مساء الخير.. كيف انت يا طاهش.. ما فعلت مع المفسبكين؟ - يا فندم مو شا اعمل لهم (البيس ) مع حسن اللوزي وزير الاعلام والفضائية اليمنية يطحنوا ستة مليار!!! ويهربوا لك المشاهدين ويخلوهم يسخطوا ويلعنوا لك ولليمن 24 ساعه. نص الشعب قد تعلم العرعره. وتشتي مني عمل؟ والله لو معي هذه الموازنه لا اخلي الشعب اليمني بدل ما يبكروا يقولوا يالله أرضي علينا وعلى والدينا با اخليهم يقولوا يا اليمن السعيدة أرضي علينا وعلى والدينا... وبا اخليهم بدل ما يعبدوا الله يعبدوا اليمن لان خلاص حب الله هي عبادة الاوطان وتقديس المواطنين.. بدل ما يحجوا للخارج يحجوا في كل ركن من اركان اليمن.. وبدل ما يصوموا لله يصوموا من اجل اليمن السعيدة. - الرئيس انت مواطن يمني وهذه بلدك ويجب ان نعمل (كُلتنا ) .. وانت اتحمل المسئولية من اجل اليمن من اجل الديمقراطية والتنمية... كُلكم أمراض ما تشتوا تشغلوا الا بزلط.. - يا فندم تدي لواحد مليارات وما تقول له حتى انت مريض ومعتوه وتشغل بنظام ديزل وسكان يمين وطيرت لنا بالزبائن حق الفضائيات اليمنية وحق العقيق وحق الايمان وحق يمانية.. وانا ادي اجهدي بس انت اسمع مني حكاية انا احميسك؟ مالك ومال وزير الاعلام!!! - الرئيس ما تشتي (تجول )؟ - يا فندم انا افدي قلبك كن اسمع لكل الناس وخذ من كل الناس كم جهدك انت تفكر لوحدك؟ يا رجال لو انت تلفزيون ولا راديوا قدك معطل 33 سنة تفكير 24 ساعه، تفكر بدل شعب مدووخ راكن عليك وبس؟ المهم يا فندم افتحوا الاستيراد لكل شيء الا الدين لا تستوردوش.. يا فندم خلونا نستورد مخدرات وهروين ولا نستورد دين.. خلونا على حقنا الدين بلدي وطعيم وما يخرجش الدم: شافعي وزيدي وقليل يهود وقليل بهرة وبس وبس انا افدي قلبك.. - الفندم: من يستورد دين؟ من وين بتدي هذا الكلام؟ ما بش عندنا هذه الكلام بطلوا لكم مزايدة هذا يمكن واحد اثنين معتوهين أمراض؟ - يا فندم الله يرحم والديك اقول لك افتح صفحة جديدة ولا تعتبر كلامي رسمي معك عفى الله عن كل المستورد من سابق حتى لو كان علي محسن الاحمر.. صفحة جديدة وبس واي دين مستورد نحرق ابوووه في حرض او في اي منفذ حدودي يدخل منه واي مبلغ مالي من السفارة الاندونسية المصرية السعودية السودانية الى اي مواطن يمني ممنوووووع بحسب (التستور والقانون ) ولا يقدم كشف حساب اذا كان معه منظمة ويعمم باسمائهم بكشف طويل عريض للشعب يعرفهم على واحد واحد.. يا فندم خلينا على خبرتنا الاشتراكيين (الشوعيين ) الشِوع .. وخبرتنا في صعدة (الشيعة ) وبس واعرف جمهورية بشرط ما حد يقول للثاني صلى ولا ما تصلي.. يكون يسكر الشوعي امام الشيعي ويصلى الشيعي امام الشوعي يعني بالمختصر مثل إيران.. يافندم عبدالله بن حسين الاحمر قد رح له.. والان الامور مع حميد الاحمر وخبرتهم قد ظهرهم مكشوووف من الخلف بعد قضية حوث يعني لا تخاف من القلبية الى قرحت رأس الحمدي اليوم بطقم عسكر با تدخل تسحبهم من نخرهم من وسط حاشد.. انا افدي قلبك يا فندم سدقني.. يا فندم اليمن موقعها الاستراتيجي يجعل الصين تدعمها قبل الشقيقة تفكر تخربها وقبل اوباما ان يقول ان اليمن مش مليح ولا مليح.. اذا حاصت عليك الامور اعتمد على الخبرة في صعده يا فندم وعين واحد منهم وزير خارجية، والخبرة في صعده عقولهم نظيفه جدا يخلوا المواطن يزيد يدفع زلط عكس الدين الجديد الى يقول لك صلى وانا با ادي زلط.. واجعل مساجد الدين المستور كلها مراكز ثقافة ومسارح واعتمد على المساجد التى كانت قبل الدين الجديد. وافتح للناس يسكروا ورجع مصنع الخمر بعدن وباينتهي موضوع الحراك كله والسخط على الوحدة الجماعه كانوا الفين على الفهنه وراحة البال مثل لو فكرت با تقطع على الخبرة في الشمال القات يمين لا يخرجوا لك بصميل أخضر.. هذه اسمها ولعه يا فندم ولعه خلوا الناس يفتهنوا الناس ما يقدروش يصبروا الى يوم القيامه يشتوا حقهم من الان السكار.. انا احميسك. يا فندم عمري 34 سنة وانا خاور ارقص في مرقص بدون ما اكون مستحي وكاني عامل فضيحة كله عندنا الا رقصة الحرب قال رقصه البرع.. يشتى الواحد يزقر حتى (مكلفه) ويقوم يرقصه هو وهي بالبيت لكن تقول له عيب وحرام؟ وكيف تشتي نعيش بسلام وبمحبه!! يا فندم تطلع فوق التكسي تشوف صاحب التكس مطرف لك صميل تحت الكرسي!!! تدخل بوابه الجامعه تشوف العسكري مطرف لك صميل..!!! تروح البيت المرة تقول لك (جزعت )عصا للعيال !!! الشعب كله في راسي مرسووم صميل ومنه اخضر ومنه يابس هههه.. نشتي يا فندم نبدل موضوع الصميل بمشاقر بورد اي شيء من هنا يبدأ السلام الحقيقي انا افدى قلبك.. انت تخطب بالناس وقدامك ورد ولكن من حولك كلهم مسلحين بصمول وبسلاح!! ما يصلحش على الاقل يكونوا يهربوا من قدام الكامرا.. والجهال يقولوا قدام الرئيس ورد ومشاقر هو الوحيد بالجمهورية رمز للسلام وللحب. وبعدين يا فندم اي واحد يشتي يكون وهابي مرحبا به مرتين لكن بدون زلط وبدون ما يدخل ولا ريال واحد من الشقيقة. وهابي يهب نفسه لله او للشقيقة او للجني الازرق لكن بدون ما يستلم زلط يكون وهابي من اجل الله يهب له الجنة مش من اجل يقول له عمه خرب اليمن هههه يا فندم .. الاعلام عندنا مضروووب .. التربية والتعليم مضرووووب .. الاوقاف مضروووب .. الثقافة مضروووب .. السياحة مضرووووب .. كلها هذه ما تحتاج الى مشاريع خرافية تحتاج الى نية صافية من المسئولين عليها فقط... يا فندم الدين الجديد قيد كل شيء.. امي زارتني بصنعاء وقالت يالله بالستر كانين النسوان بصنعاء كلهن بستاره ملونه والان كلهن سود ومبرقعات.. مو جري بهن يا ابني؟ قلت لها يا امي هذه وزارة الثقافة غائبة تطلع النسوان بالندوات وبالتلفزيون مبرقعات وهن يتاثرين بسرعه.. احمدي الله ان وزارة الثقافة ما قدرت تاثر بك لانك يمنية اصيلة برغم انك ما عرفتي مدرسة ولا حضرتي ندوة ومكانك تلبسي ملابس يمنية اصيلة بدون لون اسود.. يا فخامة الرئيس كما التلفون شطفى.. البطارية ضعيف والكهرباء طافي. التلفون يعمل زيط .. زيط .. وطفى..يا فندم والله ان التلفون طفي.. سمعت دقدقة بالباب وقوات مكافحة الارهاب تداهم العزبة يقولوا سلم نفسك سلم نفسك انت غلقت التلفون بوجه فخامة الرئيس يا زنديق.. مع كثر الخوف قمت من النوووم.. والحمد لله لا قوات مكافحة الارهاب ولا اسمى طلع بقناة الجزيرة خبر عاجل قوات خاصة من مكافحة الارهاب تداهم منزل طاهش الحوبان بسبب إغلاقة التلفون بوجه فخامة الرئيس.